कळप हुंदडे पुष्ट ढगांचा
मत्त हत्तीसम पिऊन वारा
वेदघोष पर्जन्यऋचांचा
करत चालल्या या जलधारा
नभमंची कल्लोळ माजवी
वीज नाचते सोडून लाज
धुंद होऊनी वरूण वाजवी
अनाहताचा जणु पखवाज
कुंद हवेची काळी चादर
पांघरते जेव्हा धरती
थेंब टपोरे पिऊन डोंगर
स्वप्न मनी हिरवे बघती
आनंदाची अवखळ गाणी
कोठे गाती शुभ्र प्रपात
कोठे प्राशीत लाल वारुणी
नदी भटकते झिंगून जात
***
उभी साठवत मनी चिंबपण
वेडी भिजते नाजुक वेली
हवीहवीशी जणू आठवण
कळी उमलते हळूच ओली...
हवीहवीशी जणू आठवण
कळी उमलते हळूच ओली...
Subscribe to:
Post Comments (Atom)
1 comment:
chhan aahe kavitaa. vegaLyaach aaNi prasanna upamanchi. agadee chitradarshi! laal vaaruNi piun matt hoNaari nadi aaNi hirave swapn paahaNaare Dongar - apratim!
Post a Comment