कणसूर

का जिवाला आज त्याच्या लागली हुरहूर आहे?
कोण अज्ञातातुनी* निर्यातले काहूर आहे?

लोक सारे दूर जाती - तो जरा दिसला कुठे की !
हे खरे का? की अताशा तोच त्याच्या दूर आहे?

दिसत आहे तो असा शुद्धीतला माणूस का रे?
बिघडले का आज कांही? - और त्याचा नूर आहे

गीत जे तो गात आहे बेसुरे आहे खरे ते
(शुद्ध नाही लागला - शुद्धीतला कणसूर आहे)

पैज लावा - कीर्त त्याची फारशी टिकणार नाही
तेवणारी ज्योत ना तो धधकता कापूर आहे

---------------------------------------------

*'ज्ञ' हे अक्षर जोडाक्षर म्हणून घेतले आहे.
चु.भू.द्या.घ्या.